«Мин Айыы сирин оҕотобун!» бырайыак

«Мин Айыы сирин оҕотобун!» диэн  Ньурбатааҕы Эбии үөрэхтээһин киин уонна “Сардаҥа» эбээлэр  түмсүүлэрин холбоһуктаах бырайыакпыт уочараттаах  тэрээһинэ буолан ааста. Тиэмэтэ  «Алаадьы сытынан сайыммытын көрсүөҕүҥ!” диэн.  Бу иннинэ  сайыммыт барахсан кэлиэ буоллар кэлэн, сылыйыа буоллар сылыйан  биэрбэккэ тыал-куус, арыт  хаар былаастаах  самыырын түһэрэн  хаппырыыһыран да биэртэ. Дьэ биһиги  тэрээһиммит  буолар күнүгэр  Ийэ Айылҕабыт анаан-минээн сайыҥҥылыы ип-итии күнү  бэлэхтээн үөрүү-көтүү биһиэхэ буолла.

Кыталыктаах көнө хонуутугар, чыычаах дьирибиниир ырыатынан доҕуһуоллатан  сахалыы таҥнан киэргэммит  “Сардаҥа» түмсүү эбээлэрэ,  далбар хотуттара  хомус тардан,  Антоновка оскуолатын үөрэнээччилэрин «Түһүлгэ киэргэллэрэ»  оҕо образцовай үҥкүүтүн ансамбылын оҕолоро (салай. Васильева Н. Е) чэпчэки чэпчэкитик дугунан, сиртэн- буортан тэйэн, доҕулдьуһа үктэнэн үҥкүүлээн тэрээһини саҕалаатылар. Икки көлүөнэ дьүөрэлэһиитэ кэрэ көстүү буолла. Тула түптэ буруота унаарыйда,  сайыны уруйдаан алгыс этилиннэ,  оҕолор баҕа санааларын  этэ-этэ дьэрэкээн саламанан  чэчири киэргэттилэр.

Эбээлэр Саввинова Раиса Макаровна саха алаадьыта  ас эрэ буолбакка өссө харыстыыр, арчылыыр аналлааҕын  кини ураты  суолтатын туһунан оҕолорго билиһиннэрдэ. Анисимова Евдокия Евсеевна салама суолтатын туһунан кэпсээтэ. Николаева Елизавета Николаевна  күөрчэх ытыйан күндүлээтэ.  Онтон  оҕолор эбээлэри кытта араас боппуруостарга ким төһөнү  билэринэн куоталастылар.

Кэлбит  оҕолорго эбээлэр оҥорбут   харысхалларын алҕаан туран  туттардылар уонна  олохторун суолугар  ситиһиилэри  баҕардылар.

Бу күн  алгыс этилиннэ, саламма ыйанна,  саха маанылаах астара  арыылаах алаадьы кус, собо сиэнилиннэ, быырпах иһилиннэ, күөрчэх ытыйылынна, туптэ буруота унаарда. Дьэ күөххэ үктэнии, сайыны дьиҥ чахчы сахалыы  көрсүү буолла. Саха саха буоларынан киэн туттуу күнэ үүннэ.

«Мин Айыы сирин оҕотобун!» бырайыакпыт  Убайаан оскуолатыгар ыытыллыбыт  оройуоннааҕы  инновационнай  көрүүгэ ситиһиилэннэ. Экспериментальнай площадка статуһун  ылла. Салгыы  Чурапчыга ыытыллар  республиканскай күрэххэ кыттар буоллубут!

Сайыҥҥы бириэмэҕэ «Мин төрөөбүт Ньурбабын таптыыбын!» диэн бырайыак иһинэн бырайыак үлэлиэҕэ.

Киһи – аймах олоҕо кэм кэрдии  хаамыытынан иннин диэки салаллан баран иһэр. Хас баар көлүөнэ кэлэр көлүөнэҕэ сиэр-туом ,  Ийэ айылҕаҕа  сыһыан уонна киниэхэ сөпкө олоруу тустарынан тиэрдэн,  өйдөтөн иһэр ытык эбээһинэһин умнуо суохтаахпыт. Оттон саҥа  үйэ оҕолоро саҥара да хаама да иликтэриттэн   компьютеры баһылаан, телебиэриилэри  күнү быһа  көрөн соһуйуохпут иһин дьиэҕэ олорон эрэ, ким да үөрэппэтэҕин иһин нууччалыы эрэ саҥара улаатан соһуталлара баар суол буолла. Сахалыы аахпат, сахалыы ырыаны-тойугу истибэт, интириэһиргээбэт  оҕолор олус элбээн иһэллэрэ киһини   дьиксиннэрбэт  буолуон сатаммат.

Онон бу бырайыак  саҥа үйэ оҕолоругар  сахалыы-сиэри-туому үчүгэйдик сүрэхтэригэр-быардарыгар чугастык сыһыаран өйдүүллэригэр, киһи олоҕор саамай сыаналаах баайынан  Ийэ айылҕабыт чөл туруга буоларын уонна киниэхэ сөптөөхтүк сыһыаннаһар наадалааҕын үөрэтэргэ көмө буолар. Онно саамай муударай саастарыгар сылдьар Ньурба куоратын  «Сардаҥа»  эбээлэрин  түмсүүтэ уонна олоххо сатабыллаах,  дьикти дьарыктаах бу олоххо үгүһү  ситиспит аҕам саастаах дьон,  үтүө сүбэһит буолан алтыһыылара,  олус улахан  суолталаах диэн сыаналыыбын.

Түмүктээн эттэххэ  «Мин Айыы сирин оҕотобун!» бырайыак  бу сылга барыта  9 тэрээһини  ыытта  уонна барыта 200 тахса оҕону хапта.

Киэн туттуҥ  эһиги  Айыы сирин оҕото буоларгытынан!

Давыдова В.Я  - Ньурбатааҕы  Эбии үөрэхтээһин киин  музейнай үлэҕэ методиһа .