Ньурбатааҕы Эбии Үөрэхтээһин киинэ уонна “Сардаҥа” эбээлэрин түмсүүлэрин холбоһуктаах «Мин Айыы сирин оҕотобун» бырайыактарын чэрчитинэн «Чөл олох- доруобуйа төрдө” диэн тэрээһин буолан ааста. Бу сырыыга Маар орто оскуолатын үөрэнээччилэрэ кыттыыны ыллылар. Эбиэттэн киэһэ кулуупка оскуола оҕолорун кытта көрсүһүү ыытылынна. Оҕолор чөл олох диэн тугун, кини биир тылынан кэмнэммэтин эбээлэр кулууптарын биир актыыбынай чилиэнэ Николаева Елизавета Николаевна итэҕэтиилээхтик кэпсээтэ. Доруобуйаны көрүнүү, сөпкө туттан-хаптан сылдьыы, иҥэмтэлээх аһы аһааһын, ыраас санаа, интэриэһинэй дьарык барыта чөл олох төрдө буоларын оҕолор биллилэр. Ити барыта хас биирдии киһи бэйэтин илиитин иһигэр баарын, доруобай буоларга киһиттэн бэйэтиттэн улахан тутулуктааҕын уонна онно олох эрдэттэн бэлэм буолуохтаахтарын кэпсэтистилэр. Бэйэлэрин баай опыттарыттан “Сардаҥа” түмсүү эбээлэрэ уонна ыҥырыылаах ыалдьыттар о5олорго кэпсээтилэр. Бу сырыыга оҕолор биир дэриэбинэҕэ олорор күннэтэ көрөр биир дойдулаахтарын сонургуу көрдүлэр. Ол курдук Абишева Анна Прокопьевна Маарга үүнэр эмтээх оттортон, отоннортон оҥорбут утахтарын кинилэр туһаларын туһунан кэпсээтэ, иһэн көрдүлэр. Бэйэтин сааһыгар холооно суох эдэр көрүҥнээх, куруук үөрэ-көтө сылдьар Васильева Ирина Ивановна доруобай буолуу кистэлэҥнэрин кытта үллэһиннэ. Кини скандинавскай хаамыынан, йоганан дьарыктанар эбит. Араас хамсаныылары, позалары оҥорон көрдөрдө. Хамсаныы киһи олоҕор олус наадалааҕын туһалааҕын туоһута кини тас көрүҥэр да көстө сылдьара ордук итэҕэтиилээх буолла.
Түмүккэ оҕолор алгыстаах «Баҕа санаа” суруллубут жетонун тутан үөрдүлэр туоларыгар бүк эрэнэн сиэптэригэр уктан илдьэ бардылар. Чөл олохтоох буолуу киһиттэн бэйэтиттэн улахан тутулуктааҕын, киһи дьылҕатын бэйэтэ оҥорорун оҕолор өйдөөбүттэрэ буолуо диэн эрэл санаалаах, салгыы Маардары кытта өссө да бииргэ үлэлэһэр санаалаах көрсүһүүбүтүн түмүктээтибит.
Бу тэрээһини өйөөбүт, көмөлөспүт Маардааҕы “Алаһа” култуура дьиэтин коллективыгар, директор Федорова Сардана Петровнаҕа, библиотекарь Самсонова Варвара Егоровнаҕа, бэйэлэрин баай опыттарын кэнчээри ыччакка үллэстибиттэригэр Абишева А.П, Васильева И.И уонна “Сардаҥа” эбээлэр түмсүүлэригэр махталбытын тиэрдэбит. Эһигини куруук Ситиһии, Доруобуйа эрэ арыаллаатыннар! Бука бары чөл олохтонуҥ! Айыы сирин оҕото буоларгытынан киэн туттуҥ!
Бу тэрээһиннэри Калейдоскоп оҕо телестудиятын биэриилэригэр көрөөрүҥ!
Ньурбатааҕы Эбии үөрэхтээһин киинин музейнай үлэҕэ методиһа Давыдова В.Я.
|